Bere ikasleei antzerki eta dantzaren inguruan gogoeta eragin eta profesionalizaziora eramango dituen esperientzia eskaintzea da Dantzertiren helburu nagusia, eskola gizarteratzea eta arte eszenikoek gizartean duten lekua zaintzea ere albo-helburuak dituelarik.
Profesionalizatze prozesuan ikasleei hainbat ikasgai, irakasle eta eduki eskainiko dizkie eskolak berak. Bestalde, ezinbestekoa deritzogu gure ikasleek eskolaz kanpoko beste profesional batzuekin hartu-emana izatea eta aldi berean antzerki eta dantzako profesionalek Dantzertin parte hartu ahal izatea. Horrexegatik arrakaldu, ireki, egin nahi dugu Dantzerti asteburu batez.
Formatua: eskolaz kanpoko jendearentzat ere irekiak izango diren ikastaro programa berezia, hitzaldiak eta beste jarduera batzuk, martxoaren 16 eta 18 bitartean.
Ez da nahi bezain luzea izango, baina espero dugu eragin sakona izatea parte hartuko duten pertsona guztiengan. Bigarren urtea da proiektu honekin eta bere doitasunean sinisten dugularik, urte luzez errepika daitekeen arrakala zartatzen jarraitu nahi dugu, gogotsu. Aurtengo proposamenak Inprobisazioa izango du ardatz. Inprobisazioa zentzu zabalean ulertua: dantzan, antzerkian, musikan... Beraz ikastaro guztien artean Inprobisazioaren inguruan lan egiteko proposamen anitzak izango ditugu.
