Elena Sanchez-ek "GYROTONIC Expansion Sistem" sistemaren 4 saio eman ditu, Juliu Horvathek sortua GYROTONIC ® -ren 2 saio eta GYROKINESIS ® -ren beste 2 saio konbinatuta. Lehenengoa ariketa zirkularren sistema bat da, kiribil eta uhin formakoa, ekipamendu espezifiko batekin egiten dena eta gorputzeko muskulatura indartzea eta luzatzea ahalbidetzen duena. Ariketa horiek arnasketarekin sinkronizatzen dira, zirkulazioa estimulatuz eta estresa murrizten lagunduz. Garatzen diren ariketak bizkarrezurrean zentratzen dira bereziki. Muskuluen kate funtzionalak erabiltzen dira, eta ez muskulu jakin bat; horren ondorioz, indarra, mugikortasuna eta koordinazioa aldi berean garatzen dira.
Bigarren metodoan, ariketa sistema ekipamendu espezifikorik gabe garatzen da, ariketak bankuan eta lurrean eginez, artikulazioak eta muskuluak sistematikoki landuz mugimendu erritmiko eta uhinduen bidez. Metodoak gorputz osoa lantzen du zutabearen zazpi mugimendu naturalen bidez: aurreranzko flexioa, atzeranzko luzapena, eskuinerako eta ezkerrerako inklinazioak, eskuinerako eta ezkerrerako errotazioak eta zirkuluak. Jarrerak harmonikoki konektatuta daude arnasketaren erabileraren bidez, ariketak modu naturalean jariaraziz. GYROTONIC ® metodoaren oinarrizko helburua jarrera harmonikoa eta gorputz orekatua, tonifikatua, malgua eta indartsua lortzea da.